No marco do contrato municipal de alumeado público exterior promovido polo Concello de Santiago de Compostela e executado pola UTE formada por Ferrovial e Endesa X, desenvólvense diversas actuacións orientadas á eficiencia enerxética e á redución do impacto lumínico na contorna urbana. Neste contexto, e co fin de reducir ao máximo, e mesmo eliminar, a contaminación luminosa nas zonas próximas ao Observatorio Astronómico Ramón María Aller (OMAR), proxectouse unha intervención específica no Campus Sur.
O obxectivo principal é evitar a presenza de luz intrusa nos xardíns que rodean o Observatorio, onde con frecuencia se realizan actividades con telescopios portátiles, así como impedir a iluminación directa sobre o edificio do propio centro. Estas actuacións buscan compatibilizar as necesidades de observación astronómica cun alumeado público seguro e eficiente, garantindo niveis adecuados de visibilidade tanto para peóns como para vehículos.
Sistemas de paralumen en zonas estratéxicas
Por outra banda, na avenida de Lugo prevese a substitución de oito columnas de alumeado por outras de menor altura, empregando luminarias de polímero, un material illante que mellora a seguridade das persoas. Ademais, instalaranse ópticas máis direccionais e incorporarase un sistema de paralumen que limitará a dispersión da luz cara ao ceo e ás zonas sensibles da contorna. Do mesmo xeito, na esquina da avenida de Vigo coa avenida Novoa Santos realizarase a substitución dunha columna e da luminaria existente, utilizando o mesmo modelo que na avenida de Lugo, con óptica direccional e paralumen.
A modo de proba piloto, xa se executou a actuación correspondente á avenida de Vigo, mentres que o resto se completará ao longo do mes de novembro.